«Әділет» партиясы мәдениет пен музей ісін дамытудың басым бағыттарын айқындады
Сайлауалды науқан аясында облыстық мәслихат депутаттығына партиялық тізім бойынша ұсынылған кандидаттар Гүлмира Мирхат пен Талғат Сүлейменов Өскемен қаласындағы Шығыс Қазақстан облыстық сәулет-этнографиялық және табиғи-ландшафтық музей-қорығының ұжымымен кездесті.
Кездесу барысында партия өкілдері «Әділет» партиясының 2026–2031 жылдарға арналған өңірлік сайлауалды бағдарламасын таныстырып, мәдениетті дамыту, тарихи мұраны сақтау және тұрғындардың мәдени құндылықтарға қолжетімділігін арттыру мәселелеріне ерекше назар аударды.
Талғат Сүлейменов бағдарламаның негізгі бағыттары туралы айтып, өңірді дамытудағы мәдени мұраның маңыздылығына тоқталды.
«Шығыс Қазақстанның тарихи-мәдени мұрасы бай. Осы құндылықтарды сақтау, зерттеу және кеңінен насихаттау - өңірді дамытудың маңызды бөлігі. «Әділет» партиясының сайлауалды бағдарламасында мәдениет тарихи жадыны сақтаудың құралы ғана емес, сонымен қатар жаңа идеялар мен шығармашылық бастамаларға жол ашатын, облыстың туристік әлеуетін дамытуға ықпал ететін сала ретінде қарастырылады», — деп атап өтті Талғат Сүлейменов.
Атап айтқанда, бағдарламада Shygys Creative Hub әдістемелік қолдауымен алты аудандық креативті хаб құру көзделген. Сондай-ақ қолөнершілер санын 200 адамға дейін арттыру, шығармашылық индустриялар саласы үшін 80 маман даярлау және көрмелер, жәрмеңкелер, шеберлік сабақтары мен кәсіби кездесулерді қоса алғанда, 30 мәдени іс-шара өткізу жоспарланған.
Мәдениет инфрақұрылымын дамытуға да жеке басымдық берілген. Алдағы алты жылда мәдениет нысандарын салу және реконструкциялау бойынша тоғыз жобаны жүзеге асыру жоспарланып отыр. Олардың қатарында «Берел» музей-қорығының визит-орталығы, концерт орталығы және Өскемен қаласындағы Алтай тарихы мен мәдениетінің халықаралық музейі бар. Бұдан бөлек, облыстың қалалары мен аудандарындағы 30 мәдениет нысанын жөндеу көзделген.
Гүлмира Мирхат партияның әлеуметтік міндеттемелеріне және өңір тұрғындары үшін мәдени қызметтердің қолжетімділігін арттыру мәселелеріне тоқталды.
«Мәдени мұра әрбір адамға жасына және тұрғылықты жеріне қарамастан қолжетімді болуы тиіс. Тарихи нысандар мен музей қорларын сақтап қана қоймай, олармен танысуға, оның ішінде заманауи цифрлық технологиялар арқылы танып-білуге мүмкіндік жасау маңызды. Мәдени ортаны дамыту халықтың өмір сүру сапасымен, тарихи жадты сақтаумен және ұлттық құндылықтарды келер ұрпаққа жеткізумен тікелей байланысты», — деді Гүлмира Мирхат.
Осыған байланысты бағдарламада сирек кездесетін мәдени материалдарды цифрландыру қарастырылған. 2031 жылға қарай мұндай материалдардың цифрлық форматқа көшірілген үлесін 78,5 пайызға, оның ішінде музейлерде 81,7 пайызға жеткізу жоспарланып отыр. Бұл мәдени мұраға қолжетімділікті кеңейтіп, оны қалың көпшілікке танытуға мүмкіндік береді.
Дайындаған: «Әділет» партиясының Шығыс Қазақстан облысы бойынша филиалының баспасөз қызметі.
Тапсырыс беруші: Мекеева Ж.Ж
«Шығыс Қазақстан облыстық мәслихаты депутаттарын сайлауда» партиялық тізімді ұсынған «Әділет» партиясы» ҚБ-ның сайлау қорынан төленді.